- ХУУРАЙ БОЛОН ЧИХЭРЛЭГ ДАРСНЫ ЯЛГАА
Үүний гол ялгаа нь тухайн усан үзмийг исгэх явцдаа сахарыг нь хэр гүйцэд исгэсэн гэдгээс шалтгаалдаг. Усан үзэм цаанаасаа байгалийн сахар буюу фруктозийг агуулдаг бөгөөд уг сахарыг бүрэн исгэвэл DRY буюу хуурай, харин сахарыг бүрэн исгэхгүй бол SWEET буюу чихэрлэг дарс гардаг. Зарим тохиолдолд Semi Dry буюу хагас хуурай дарс гаргадаг. Энэ нь сахарыг бага зэрэг дутуу исгэсэн гэдэг нь ойлгомжтой. Тэгэхээр хуурай дарс илүү хатуу, спиртлэг харин чихэрлэг дарс эсрэгээрээ зөөлөн, чихэрлэг таатай амттай гэсэн үг. Сахарыг нь дутуу исгэсэн гэдэг нь муу дарс гэсэн үг биш. Нэгдүгээрт дарс үйлдвэрлэгч нарын бүтээгдэхүүнээ төрөлжүүлэх нэг арга, нөгөө талаас усан үзмийн сорт бүр хуурай болон чихэрлэг дарсанд илүү тохирдог тохиолдол бий. Жишээ нь Malbec сортын усан үзмийн дарс ихэвчлэн хуурай байдаг, дарснууд тэр дундаа улаан дарсан дундаа хатуулгаараа хүнд жингийн тамирчин гэсэн үг. Хүн бүрийн дуртай амт өөр учраас хуурай дарсанд ч, чихэрлэг дарсанд ч хэрэглэгч байгаа гэсэн үг.
- ҮНЭТЭЙ БА ХЯМД ДАРС
Дарсыг үнэд хүргэхэд хэд хэдэн зүйлс нөлөөлдөг. Үүнд, тухайн усан үзмийн сортын олдоц байдал, түүнийг тариалсан бүс нутгийн нэр хүнд, тухайн дарсыг урласан үйлдвэрлэгчийн нэр хүнд бас туршлага, дарс нэрсэн давтагдашгүй арга барил, тухайн ургацын жилийн цаг агаар зэрэг нь орно. Үүнээс гадна олон жил хадгалсан, олдворын, түүхэн дарснууд өндөр үнэтэй байдаг бөгөөд эдгээр дарсыг зарим тохиолдолд уух гэж биш хөрөнгө оруулалтын зорилгоор хүмүүс дуудлага худалдаагаар авдаг. Франц, Итали дарснууд ерөнхийдөө өдөр тутмын, өргөн хэрэглээний дарснуудаа хүртэл хуучин хэв маягаар шошгожуулж, үйсэн бөглөө хийж үйлдвэрлэдэг, энэ нь нэг талаас үнэтэй харагдах мэт боловч бусад орчин үеийн савлагаатай болон сүүлд гарч ирсэн шинэ дарснуудтай ижил үнэтэй байдаг. Австрали, Америк тэргүүтэй дарсны шинэ дэлхийн үйлдвэрлэгчид дарсны өнгө үзэмжийг илүү шинэлэг, орчин үеийн, энгийн болгосон. Иймээс та аливаа дарсны үнэ болон бусад мэдээллийг авах бол интернетээс дарсны аппликэйшнүүдийг ашиглаж байхыг зөвлөе.
- ЦАГААН, ЯГААН, УЛААН, ДАРСНЫ ЯЛГАА
Хүмүүсийн дунд улаан дарсыг зөвхөн улаан усан үзмээр, цагаан дарсыг зөвхөн цагаан усан үзмээр хийдэг гэдэг өрөөсгөл ойлголт байдаг. Яг үнэндээ бүх төрлийн усан үзэмнээс цагаан дарс гаргаж болох боловч эсрэгээрээ бүх төрлийн усан үзэмнээс улаан дарс гаргаж болохгүй. Энэ нь цагаан дарсыг усан үзмийн зөвхөн шүүсийг ашиглан хийдэг бол улаан дарсыг исгэхдээ шүүсэн дээр нэмж тухайн үзмийн хальс болон үрийг давхар хийж исгэдэг гэсэн үг. Үүний дүнд дарсны өнгө улаан, ягаан болдог. Ягаан дарсны хувьд зөвхөн хальсыг ашигладаг нь улаан дарсанд үрийг нь давхар ашигладгаас арай ондоо. Олон зуун жилийн хэрэглээ болон энэ явцад хийгдсэн олон туршилтуудын үр дүнд одоо байгаа сортуудаас гаргаж авсан улаан, цагаан дарснууд бол шалгарсан арга юм. Нэг үгээр хэлбэл дээр дурдсанчлан зарим улаан усан үзмээр зөвхөн улаан дарс хийнэ, зарим цагаан сортоор зөвхөн цагаан дарс хийнэ гэсэн үг, харин заримаар нь улаан болон ягаан дарс хийдэг. Жишээ нь Cabernet Sauvignon хэмээх улаан усан үзмийн сортоор зөвхөн улаан дарс л хийнэ, харин Pinot Noir улаан сортоор улаан болон ягаан дарс хийж болно.
Бэлтгэсэн: World Wine