Австрийн дэд канцлерын авлигатай холбоотой видео бичлэг түүнийг огцроход хүргэлээ.
Энэ сарын 23-нд болох Европын парламентын сонгууль болохоос хэдхэн хоногийн ѳмнѳ буюу энэ бямба гаригт Австрийн топ улс тѳрчдийн нэг болох хэт барууны үзэлт Эрх Чөлөөний Намын удирдагч дэд канцлер Хайнц-Кристиан Штрахе үүрэгт ажлаасаа огцорч байгаагаа албан ёсоор зарлалаа.
2017 oны 7-р сард буюу Австрийн үндэсний сонгууль болохоос хэдхэн сарын ѳмнѳ Испанийн Ибиза арал дээрх нэгэн харшид болсон дэд канцлер Хайнц-Кристиан Штрахегийн хувийн уулзалтын үеэрх яриаг зургаан цагийн турш нууцаар бичсэн дүрс бичлэгийн хэсгээс Германы ѳдѳр тутмын сонин “Sueddeutsche Zeitung” болон долоо хоног тутмын “Der Spiegel“ сэтгүүл 2019 oны 5-р сарын 17-ны ѳдѳр олон нийтэд ил болгон нийтэлсэн байна.
Уг видео бичлэг дээр Хайнц-Кристиан Штрахе болон түүний намын анд бѳгѳѳд Эрх Чөлөөний Намын парламентын бүлгийн дарга Иохан Гуденус нар, Оросын олигархын зээ охин гэж ѳѳрийгѳѳ танилцуулах нэг эмэгтэй, түүний дагалдагч ѳѳр нэг эмэгтэй мѳн орчуулагч зэрэг 5 хүний уулзалтын яриа бүхий дүрс бичлэгт олигархын зээ хууль бус эх үүсвэрээс гаралтай их хэмжээний мѳнгѳѳр Австрид хѳрѳнгѳ оруулах хүсэлтэй байгаагаа илэрхийлэн Австри улсад борлуулалтын тоогоороо тэргүүлдэг нэр нѳлѳѳ бүхий ѳдѳр тутмын “Kronen Zeitung“ сонины тодорхой хувийг худалдан авах сонирхолтой гэсэн санал тавьж байгаа нь бичигдсэн байна. Хайнц-Кристиан Штрахе түүний саналыг дэмжиж тус “Kronen Zeitung“ сонины мэдээллүүдийг Эрх Чөлөөний Намын эрх ашигт нийцүүлэн намынх нь талаар зѳвхѳн эерэг мэдээлэл бэлтгэн нийтлүүлж сонгуульд ялалт байгуулахад нѳлѳѳлѳх боломжтой эсэх, цаашлаад Унгарын Ерѳнхий сайд Виктор Орбаны адил хэвлэл мэдээллийн хэрэгслүүдийг хяналтандаа оруулж, сонгуулиар Засгийн газарт тодорхой хэмжээний суудал авах тохиолдолд улсын ѳмчийн статус бүхий Австрийн Үндэсний Олон Нийтийн Радио Телевизийн байгууллага болох “ORF”-ийг хүртэл хувьчлах боломж байж болох талаар ярьжээ. Олон цаг үргэлжлэх уг видео бичлэгт мѳн хууль бус замаар намын санхүүжилт хийх, төрийн өмчийн хөрөнгөөр ажил үйлчилгээг хууль бусаар оросын олигархуудад олгох боломжуудын талаар хэрхэн ярилцаж буй нь олон нийтэд ил тавигджээ.
Хайнц-Кристиан Штрахе үүрэгт ажлаасаа огцрох болсон шалтгаанаа тайлбарлахдаа ѳѳрийгѳѳ гадны тагнуулын этгээдүүдийн урьдаас тѳлѳвлѳн зохион байгуулсан урхинд орсон гэжээ. Ѳѳрийгѳѳ согтууруулах ундааны нѳлѳѳн дор тагнуулуудын золиос болсон мэтээр тайлбарлан ард түмнийхээ ѳмнѳ уучлал хүсэн мэдэгдэл хийсэн нь түүнийг дэд канцлерын албанд тохирохгүйгээс гадна улсынхаа эрх ашиг, аюулгүй байдалд сѳргѳѳр нѳлѳѳлѳх улс тѳрч гэж Австричуудын нэгэнт хийсэн дүгнэлтийг ѳѳрчлѳх боложгүй юм.
Австрийн болон зарим олон улсын хэвлэл мэдээллүүд Орос улс Европын зүрх болох Австрийн Засгийн газрын дотоод хэрэгт шууд нѳлѳѳлѳх оролдлого хийлээ гэсэн ѳнцгѳѳс тайлбарлаж байна. Тус видео бичлэгийг хэн ямар зорилготойгоор урьдчилан зохион байгуулж нууцаар хураасан, мѳн Австрийн канцлер Хайнц-Кристиан Штрахе хээл хахууль тѳлсѳн эсэх зэрэг асуудлуудыг тогтоохоор Австрийн хуулийн байгууллага шалгаж эхлээд байна.
2019 оны 5-р сарын 18-ны Бямба гаригийн орой Австрийн канцлер бѳгѳѳд “Ардын нам”-ын тэргүүн Себастиан Курц мэдэгдлийнхээ үеэр “Эрх Чөлөөний Намтай хамтарсан Засгийн газар ажиллуулж эхэлснээс хойш тус намын удаа дараа гаргаж буй алдааг би тэвчиж ирсэн, харин энэ удаад “Хангалттай бол хангалттай“ гэж дурдаад хэт барууны Эрх Чөлөөний Намтай хамтарсан Эвслийн бүлгийн үйл ажиллагаа үүгээр хугацаанаасаа өмнө дуусгавар болсныг зарлаж дахин шинэ сонгууль зохион байгуулах шаардлагатай гэдгийг мэдэгдлээ.
* Нийтлэлд ашигласан зураг: Copyright @ Krone.at
2019 оны 5-р сар
Эрдэнэнямын Одонтуяа
Австри, Вена дахь чѳлѳѳт сэтгүүлч