“Ноён-уул Эрдэнэ” ХХК буюу хүмүүсийн хэлж заншсанаар “World Wine” компаниас зарласан “Дарс+Монгол хоол” гэрэл зургийн уралдааны шилдгүүд тодорлоо.
Тус компаниас зар сурталчилгааны фото зургийг хөгжүүлэх, гэрэл зураг сонирхогчдыг дэмжих, дарсыг Монгол үндэсний хоолтой хэрхэн зохицохыг хэрэглэгчдэд бүтээлчээр таниулах зорилгоор уг гэрэл зургийн уралдааныг зарлажээ.
Тэмцээн хоёр шаттай өрнөсөн. Нэгдүгээр шатанд, тэмцээнд ирсэн бүтээлүүдээс шүүгчид эхний арван зургийг сонгожээ. Соёлын гавьяат зүтгэлтэн, гэрэл зурагчин С.Цацралт, Соёлын гавьяат зүтгэлтэн, шог зураач С.Цогтбаяр болон “World Wine” компанийн төлөөлөл ирсэн бүтээлээс шалгаруулсан байна.
Харин дараагийн шатанд тухайн бүтээлүүдийн нийгмийн сүлжээнд байршуулж, хамгийн их хандалт /лайк, шейр/ цуглуулсныг харгалзаж, эхний гурван байрыг шалгарууллаа.
Өөрсдийн бүтээлч санааг гэрэл зурагт буулган уг тэмцээнд оролцсон хүмүүст “Ноён-уул Эрдэнэ” ХХК-аас:
- Нэгдүгээр байр 1’000’000 төгрөг,
- Хоёрдугаар байр 500’000 төгрөг
- Гуравдугаар байр 300’000 төгрөг
- 1-10-р байр Calvet брэндийн бэлгийг гардуулсан юм.
Тэмцээний эхний гурван байрт орсон оролцогчдоос сэтгэгдлийг нь сонслоо.
Ё.Нямдаваа: МИНИЙ ХУВЬД ДАРС БОЛ АЙРАГ
Тэмцээний тэргүүн байрын эзэн Ё.Нямдаваа: “CALVET брэндийг тодотгох үүднээс харанхуй орчинд дарсан дээрээ гэрэл тусгаж, цаана нь хөндлөн гэрэл өгсөн. Бууз болон чанасан махыг Монгол хоолны төлөөлөл болгосон юм.
Энэ зургаа битүүний орой бараг гурван цагт 400 удаа дарсан байх. Гэрийнхэн битүүлэх гээд байхад би зургаа дарсаар л.
Дарсыг монгол ахуй, монгол хоолтой хэрхэн зохицох вэ гэсэн агуулгатай уралдаан зарлаж, сонирхлынхоо хүрээнд оролцох боломж өгсөнд Ноён Уул Эрдэнэ компанийн хамт олонд баярлалаа. Далай лам хэлсэн байдаг архиа бага уу айргаа тааваараа уу гэж. Миний хувьд дарс бол айраг юм даа” гэв.
Ч.Одсүрэн: ДАРСЫГ ТАНСАГ ХЭРЭГЛЭЭ ГЭДЭГ НЬ ТАШАА ОЙЛГОЛТ
Тэмцээний дэд байрын эзэн Ч.Одсүрэн: “Өөрийн цуглуулсан үйсэн бөглөөгөөр хийсэн ширээгээ зургандаа оруулахыг зорьсон. Харин хоолны хувьд цуйван, шорлог таваглаж, план байдлаар зургаа дарсан.
Би дарс хэрэглэх дуртай. Ялангуяа цагаан дарсыг түлхүү хэрэглэдэг. Хүмүүсийн дунд дарсыг тансаг хэрэглээ гэсэн ойлголт түгээмэл байдаг ч үүнийг ташаа ойлголт гэж хэлмээр байна. Мэдээж үнэтэй дарс байдаг ч боломжийн үнэтэй ч бий. Дарсыг тохируулан хэрэглэх нь эрүүл мэндэд ч тустай гэдэг шүү дээ” гэв.
Харин гуравдугаар байрын шагналын эзэн Б.Мөнгөнбагана өөрийн биеэр ирж чадаагүй бөгөөд түүний ээж “Миний хүү тогооч мэргэжилтэй. Өөрийн сонирхлоор гэрэл зураг дардаг. Энэ тэмцээнд ажил, сонирхлоо хослуулан, амжилттай оролцож байр эзэлсэнд баяртай байна” гэлээ.
“World Wine” компаниас зарласан уралдаанд шалгарсан гэрэл зургуудыг бүтээгдэхүүний зар сурталчилгаанд ашиглах юм байна.
Бэлтгэсэн: World wine