Үйсэн бөглөөтэй дарс чанартай, ориг байдаг. Харин чанар муутай дарс л эргэдэг бөглөөтэй байдаг гэсэн төөрөгдөл хүмүүсийн дунд байдаг. Тэгвэл бид энэ удаад үйсэн бөглөө болон эргэдэг бөглөөний ялгаа, давуу болон сул талыг хүргэхээр бэлдлээ.
Үйсэн бөглөө
Үйсэн бөглөөг Европд 1400 оноос эхлэн дарсны бөглөөгөөр хэрэглэж ирсэн байна. Яагаад гэвэл үйс нь цөөхөн байдаг дарсны шилийг таглаж болох зөөлөн бүтэцтэй, байгалийн гаралтай материал. Мөн тухайн цаг үед дарсны хундага ч мөн адил нийтлэг алдартай хэрэглээ болж эхэлсэн байна.
Үйсэн бөглөө: Давуу тал
- Байгалийн дахин сэргээгдэх нөөцтэй
- Түүхэн хэрэглээгээрээ олонд танигдсан
- Удаан хадгалахад тохиромжтой нь батлагдсан
Үйсэн бөглөө: Сул тал
- Үнэтэй (2-3 дахин)
- Нийт дарс үйлдвэрлэлээс 1-3 хувьд үйс нь дарсандаа шингэж дарсаа муутгах тохиолдол байдаг ч дахин хэлэхэд 1-3 хувь буюу маш ховор тохиолддог.
- Чанар нь хувирдаг
- Байгалийн нөөц нь хязгаартай
Эргэдэг бөглөө
Эргэдэг бөглөө нь дарсанд дөнгөж 1964 оноос л хэрэглэгдэж эхэлсэн ч одоогоор нийт зах зээлийн томоохон хувийг эзэлдэг. Хэрвээ та Австралид очиж үзвэл тэндхийн бараг бүх дарсанд эргэдэг бөглөө ашиглаж байгааг харах болно. Эргэдэг бөглөө алдартай болсон шалтгаан нь 1980-аад оноос чанартай үйсэн бөглөөний үйлдвэрлэл буурсантай холбооотой. Дарс үйлдвэрлэгчид чанаргүй үйсэн бөглөөнөөс болж дарс муудах асуудлаас залхсан тул эргэдэг бөглөөгөөр өөрчилсөн байна.
Эргэдэг бөглөө: Давуу тал
- Илүү боломжийн үнэтэй
- Үйсэн бөглөө шиг дарсыг муутгах асуудал байхгүй
- Удаан хадгалах талаар судалгаагаар эерэг үр дүн гарч байгаа
- Онгойлгоход хялбар
Эргэдэг бөглөө: Сул тал
- Дахин боловсруулалтанд орж болох ч байгальд задрах боломжгүй
- Олон төрөл, чанартайг үйлдвэрлэх боломжтой
- Хямд дарс гэсэн ойлголттой холбогдож байдаг
Нэгтгээд хэлэхэд үйсэн болон эргэдэг бөглөөний аль аль нь сул болон давуу талтай. Үйсэн бөглөө нь илүү уламжлалт, олонд хүлээн зөвшөөрөгдсөн хэдий ч илүү үнэтэй бас дарсанд халдварлаж муутгах талтай. Эргэдэг бөглөө нь илүү тогтвортой үйлдвэрлэж болох ч байгальд задардаггүй. Мөн арай хямд харагддаг. Үүнээс харахад нэг нь нэгнээсээ илүү гэхгүйгээр аль алинд нь боломж олгож хэрэглээд үзээрэй гэж зөвлөе.
Бэлтгэсэн: World Wine