Сүүлийн 4 жилийн турш бичсэн 200 гаруй нийлэлүүдээ эмхэтгэн, нийгэм, хувь хүний тухай “Монгол чинь таны гарт”, эдийн засгийн тухай “Баялаг амьдралын тухай”, нийтийн засаглалын тухай “Ухаалаг төрийн нууц” гэсэн 3 ном болгон хэвлүүлж уншигч та бүхэндээ хүргэж байна.
“Монгол чинь таны гарт” номонд Монголын нийгмийн өмнө шинэ зууны эхээр тулгарч байгаа гол гол асуудлуудыг гаргаж, бид бүгдээрээ хамтран яаж шийдэх; хувь хүн нийгмийнхээ идэвхитэй гишүүн байхын тулд ямар зан чанаруудыг өөртөө шингээн агуулж болох, нийгмийн ямар үйл ажиллагаанд оролцож болох тухай бичсэн нийтлэлүүдээ;
“Баялаг амьдралын төлөө” номонд зах зээлийн зарчим руу шилжиж буй Монголын эдийн засагт хувийн хэвшлийн гүйцэтгэх үүрэг, хувийн хэвшил өрсөлдөх чадвартай байлгахын тулд төрөөс микро эдийн засгийн ямар бодлого, зохицуулалт гаргавал нь зүйтэй болох, Монголын төрийн макро эдийн засгийн бодлогын алдаа онооны тухай цаг үеийн гол асуудлыг тойруулан бичиж тодорхой санал гаргасан нийтлэлүүдээ;
“Ухаалаг төрийн нууц” номонд улс төр, эдийн засгийн давхар шилжилт хийж байгаа оронд нийтийн засаглалын институцийг цоо шинээр эмхлэн байгуулах, бэхжүүлэн хөгжүүлэх, хууль тогтоох, гүйцэтгэх болон шүүх засаглалыг амьдрал дээр ялган зааглахад чиглэсэн нийтлэлүүдээ тус тус багтаалаа.
Цуврал номын нээлтийг 2013 оны 1-р сарын 22-ны өдөр Интерном номын дэлгүүрийн төв салбарт хийсэн бөгөөд хамгийн эхэнд ирсэн 20 уншигчдад “Ухаалар төрийн нууц” номоо бэлэглэлээ. Нээлтийн үеэр манай орны өнөөгийн нийгэм, эдийн засаг болон улс төрийн нөхцөл байдлыг товч бөгөөд тодорхой дурдаад, хамтдаа бид хэрхэн асуудлуудыг шийдэж, эх орныхоо хөгжилд хувь нэмэр болж болох талаар ярилцлаа.
Ном бүрээс Монголын Үндэсний Номын Сан болон Д.Нацагдоржийн нэрэмжит, Улаанбаатар хотын нийтийн төв номын санд бэлэглэсэн тул уншигчид та бүхэн өргөнөөр унших боломжтой.
Номнуудыг Интерном номын дэлгүүрт худалдаалж байна.
