2014 оны 4 дүгээр сарын 3-ны өдөр Улаанбаатарын эдийн засгийн клубын сар тутмын үйл ажиллагаа Туушин БэстВэстэрн Примиэр зочид буудалд амжилттай зохион байгуулагдаж өнгөрлөө. Үндсэн илтгэгчээр эдийн засагч Д. Жаргалсайхан, “Оюу толгой” ХХК-ны ТУЗ-ын гишүүн Да. Ганболд нар оролцлоо. Клубын зорилго нь Монголын шилдэг бизнес эрхлэгчид, эдийн засагчид, улс төрчид хамтдаа монголын эдийн засгийн асуудлаар ярилцах, санал солилцох, хэлэлцүүлэг өрнүүлэх талбар байх юм.
Нэрт эдийн засагч Д. Жаргалсайхан монголын төр хувийн хэвшил, бизнест оролцож байгаа нь эдийн засгийн үр өгөөжийг тасалдахад хүргэж байгаа талаар илтгэл тавьсан. Тодруулбал төрийн ил тод байдал байхгүйн улмаас төрийн өмчит болон бусад жижиг дунд компаниудад өгч байгаа зээл нь яаж зарцуулагдаж байгаа нь тодорхой биш байна. Зээлэнд мөнгийг хэрхэн зарцуулсанг судласнаар зээлийн үр дүнг хэмжих нөгөө талаар авлигад хэр өртсөнг нь харах боломжтой гэжээ.
Эдийн засагч Да. Ганболд монголын эдийн засаг, улс төрийн түүх өнөөдрийн засаг төрд хэрхэн нөлөөлж байгаа талаар мөн засгийн газарт байгаа хэд хэдэн асуудлуудыг дэлгэн тавьж засгийн газар ойрын хэдхэн жилийн хугацаанд яаж буруу явсанаа ойлгон харах хэрэгтэй байгаа талаар ярьлаа.
Хоёр илтгэгчийн маань хэлсэн ерөнхий санаа нь засгийн газраас их хэмжээний бонд гаргасан нь эргээд нийт бизнес эрхлэгчид болон ард түмэнд шударга бус өрсөлдөөнийг бий болгож байна гэсэн юм.
Илтгэлийн дараа оролцогчид болон клубын гишүүд асуулт асууж чухал асуудлуудаар хэлэлцүүлэг өрнүүлсэн. Нэг сонирхолтой асуудлаар мэтгэлцээн өрнөсөн нь монгол дахь орлогын зөрүүтэй байдлын тухай байлаа. Монголд дундаж давхаргын хүмүүс маш бага, чинээлэг хүмүүсийн тоо өсч байгаа ч тэд хамаатан саднаараа хөрөнгөждөг, энэ тоо ядуу хүмүүстэй нь харьцуулахад асар бага тоо юм. Чөлөөт зах зээлийн эдийн засагч
Д. Жаргалсайханы хэлж байгаагаар амьжиргааны түвшин өндөртэй эдийн засгийн хөгжилд хүрэх гол түлхүүр нь чөлөөт үйлдвэрлэл, чөлөөт өрсөлдөөн юм. Чинээлэг давхаргынхан үүнийг бүтээхэд маш чухал үүрэгтэй оролцож олон хүмүүсийг өндөр цалингаар ажиллуулах боломжтой. Олон улсын валютын сангийн өнгөрсөн сарын мэдээгээр орлогын тэгш байдлын зөрүү багатай улсуудаас илүү орлогын тэгш байдлын зөрүү ихтэй улс орнууд илүү хурдацтай хөгжиж байгаа ажээ.
Улаанбаатарын эдийн засгийн клубын уулзалт сар бүр зохион байгуулагдана. Гишүүнээр элсэх болон оролцох хүсэлтэй байвал 8904-8684, 9988-6912 утсаар холбогдож болно. www.econclubub.mn