“Цогц хөгжлийн үндэсний төв”-ийн гүйцэтгэх захирал
Их хурлын гишүүд хийх ёсгүй юмаа хийгээд яваад байгаагийн нэг шалтгаан нь иргэдийн боловсрол, хандлагатай шууд холбоотой. Тухайлбал их хурлын гишүүн уулзалт хийх гээд ирэхээр “манайд нэг гэр өгөөч, гэрийн бүрээс өгөөч, хүүхдийг маань ажилд оруулаад өгөөч” гэдэг. Тэр хүний хийх ёсгүй ажлыг нь иргэд шаардаад эхлэхээр тэр хүн чинь улс төрийн амьтан учраас саналыг нь авахын тулд “өө тэгье, гэрийг нь өгье, бүрээсийг нь өгье” гээд бүх юмыг амлаад явчихдаг. Гэтэл тухайлбал, их хурлын гишүүнээс та Хөдөлмөрийн тухай хууль дээр Залуучуудын хөдөлмөр эрхлэлтийг дэмжсэн хэлэлцүүлэгт оролцоогүй байна шдээ, тэнд та бид нарын эрх ашгийг ярих ёстой шдээ, та хууль ерөөсөө санаачилж ажиллаагүй байна шдээ гэж асууж, шаардах ёстой. Тийм иргэд олон болж байж их хурлын гишүүн болох амархан байхаа болино.