“Оюутолгой” төслийн гүйцэтгэх захирал асан
Камерон МакРэй нь СкайПаать Партнерсийн Ерөнхийлөгч. Мөн тэрбээр Кинкора Коппер компанийн ТУЗ-д зөвлөхөөр ажилладаг төдийгүй, Монголын стратегийн асуудлууд дээр төвлөрсөн хараат бус “тинк танк”-ийг үүсгэн байгуулагч юм.
Өмнө нь тэрбээр 2010 оны 11-р сараас 2013 оны 10-р сар хүртэл Оюу Толгой ХХК-д Гүйцэтгэх Захирал болон Ерөнхийлөгчийн албан тушаалыг тус тус хашиж байсан бөгөөд Монгол дахь Рио Тинто компанийн захирал байсан билээ. Камерон нь Оюу Толгой компанийн бизнесийн талын бүх асуудлыг хариуцаж байсан.
Камерон нь уул уурхайн салбарт ажилласан 30-аас дээш жилийн туршлагатай хүн юм. Оюу Толгойд орохын өмнө тэрбээр Өмнөд Африкт Ричардс Бай Минералс, мөн Зимбабвед Мурова Диамонд компаниудын Гүйцэтгэх Захирлаар тус тус ажиллаж байсан. Мөн Рио Тинтогийн голлох бизнес болох эрчим хүч, зэс, алмаз, аж үйлдвэрийн эрдэс баялгийн хэлтсүүд төдийгүй компанийн удирдлагын зэрэглэлд удирдах алба хашиж байжээ.