МУИС-ийн шинжлэх ухааны сургуулийн захирлын үүрэг гүйцэтгэгч
Б.Болдгив нь МУИС-ийг 1995 онд биологич мэргэжлээр төгссөн. 1997 онд МУИС-д биологийн ухаанаар магистрын зэрэг хамгаалсны дараа МУИС-ийн Экологийн тэнхимд багшилж эхэлсэн. Тэрээр 1999-өөс 2001 онд АНУ-ын Корнеллийн Их Сургуульд суралцаж магистрын зэрэг, 2001-ээс 2006 онд АНУ-ын Пенсильваний Их Сургуульд суралцан, экологи, эволюцийн биологи, туршилтын дизайн, биологийн статистик анализаар мэргэшиж докторын зэрэг хамгаалсан.
Б. Болдгив нь 2006 оноос тус сургуулийн Экологийн тэнхимийн эрхлэгчээр ажиллах хугацаандаа тэнхимийнхээ багш судлаачидтай хамтран олон улсын түвшинд хүрсэн экологи, эволюцийн судалгааны баг бүрдүүлэхээр зорин ажилласан нь зохих үр дүнд хүрч уг баг МУИС-иас олон улсын түвшний эрдэм шинжилгээний өгүүллийн багагүй хувийг хэвлүүлэн гаргадаг болжээ.
1995 оноос Хөвсгөл нуурын судалгаагаар эрдмийн ажлын гараагаа эхэлсэн тэрээр Хөвсгөл нуур, түүний орчмын биологийн олон янз байдал, экосистемийн судалгааг олон улсын судлаачидтай хамтран хийж, уур амьсгалын өөрчлөлт, газар ашиглалтын үр дагаврыг туршилтын аргаар судалж эхэлсэн нь Монголд төдийгүй бүс нутгийн хэмжээнд анхдагч ажлуудын нэг болсон юм. Тэрээр олон улсын байгууллагуудын санхүүжилттэй судалгааны төслүүдийг удирдаж, хамтран хэрэгжүүлж ирсэн.