Таатай биш байгаа энэ цаг үед таныг тайвшруулж, жаргал бэлэглэх 5 аргыг зааж өгье. Шинжлэх ухааны үндэслэлтэй тул хэнд ч тодорхой хэмжээгээр үр дүнгээ өгөх болохоор та анхаарлаа төвлөрүүлээд оролдоод үзээрэй.
1. Анзаар, Мэдэр, Орхи тэгээд Тайвшир.
Яах учраа олохгүй хий дэмий түгшүүрлэж байвал дараах аргыг хэрэглээрэй. Зааврын дагуу, дарааллыг нь баримтлаад ажиллахад л болно.
- Алхам 1. Анхаарлаа өөр зүгт хандуул
- Алхам 2. Тав хүртэл эд зүйлсийг олж хар
- Алхам 3. Хүрч болохуйц 4 зүйлд хүрээрэй
- Алхам 4. Сонсож болохуйц 3 өөр зүйл сонсоорой
- Алхам 5. Үнэрлэж болохуйц 2 үнэр мэдэр
- Алхам 6. Ямар 1 зүйлийг амтлаарай
ОДОО ТА ТАЙВШИРСАН БАЙГАА. Хэрэв заавраа дагаж, анхаарлаа төвлөрүүлсэн бол шүү дээ.
2. ТАЙВШИРМААР байна уу? Хоёр минут юу ч битгий хий.
http://www.donothingfor2minutes.com/ хаягаар ороод чихэвчээ зүүгээд, дэлгэцээ ширтээд, юу ч битгий хий. Зүгээр л мэдэр. Харин та өөрийгөө анзаараарай. 2 минут ч зүгээр сууж чадахгүй утсаа оролдох гээд, ийш тийшээ анхаарлаа сарниулах гээд байх вий. Тайван бас зүгээр сууж сурна гэдэг бас нэг талаасаа бясалгал шүү.
3. Дотор тань давчдаад болж өгөхгүй байвал яг одоо БАЙГАЛЬ ЭХ танд тусална. Гэрээсээ яг одоо мэдэрнэ гээд боддоо.
Үнэ төлбөргүй хэрнээ таныг хачин ихээр тайвшруулж, сэтгэлийг тань онгойлгож, уужруулах ид шидтэн бол https://simplynoise.com/ Өөрийн мэдрэмжээрээ байгалийн чимээгээ ихэсгэж бас багасгаж болно.
Мөн та яг одоо КОФЕ ШОП ормоор байна уу?
Дуртай кофегоо бэлтгээд https://coffitivity.com/ -руу ороход л болно. Энд кофе шопын орчны чимээг төрөл бүрээр оруулсан байгаа. Зарим нь үнэгүй, зарим нь үнэтэй.
4. МЭДРЭМЖ-үүдээ нэрлэ, анзаар, тань, учрыг нь ол.
Та өөрт мэдрэгдэж буй бүх мэдрэмжүүдээ цувуулж бичээд нэг үзээрэй. Ихэвчлэн нэр үг байх хэрэгтэй шүү. Жишээ: Айгаад байна биш айдас гэх мэт. Тэгээд тус бүрт нь дараах асуултуудад хариулаарай.
- Хэзээ тэр мэдрэмжийг мэдэрдэг вэ?
- Ийм мэдрэмжтэй байхдаа та ямар үйлдэл хийдэг вэ?
- Таныхаар энэ мэдрэмжүүдийг яаж зохицуулах хэрэгтэй вэ?
- Энэ мэдрэмжийг аль болох бага мэдрэхэд юу танд хэрэгтэй вэ?
5. УРАН бүтээлч болонгоо ТАЙВШИРЧ бас болно.
Та гүүглээс Мандала, Mandala гэж хайгаад л гарч ирэх хар цагаан зургийг хэвлэж аваад өөрийнхөөрөө будахад л болно. Та будах үедээ зөвхөн одоо цаг дээр төвлөрч чаддаг болохоор тархи тань амарсан байхыг мэдрэх болно.
Гэрэлтэй, дулаахан, сайхан бүхнийг хүсье. Айсуй баярын зөнд итгээрэй.
2020 оны 3-р сар
Д.ЛХАМСҮРЭН, Сэтгэл Судлалын Үндэсний Төвийн сэтгэл судлаач