Өдрийн сонин дээр Ерөнхийлөгч асан Ц.Элбэгдоржийн өдрийн тэмдэглэлийн цуврал гарч байна. 2019 оны 4-р сарын 11-ний дугаарт гуч шахам жилийн өмнөх нэгэн хурлын тухай тэмдэглэл нь хэвлэгджээ. Энэ тэмдэглэлд дурдсан Монголын улс төрийн шинэ хүчнүүдийн анхны хурлыг Монголын Оюутны Холбоо (МОХ) санаачлан зохион байгуулсан юм. Миний бие тус хурлыг хамтран удирдаж, бас тэмдэглэл хөтөлсөн тул энд түүнийгээ анх удаа уншигчидтайгаа хуваалцаж байна.
“1990.02.24. Бямба.
08:30. МХЗЭ-ийн (Монголын хувьсгалт залуучуудын эвлэл) ТХ-ны (Төв хороо) аппаратын мэдээлэл
- Би ОУОХ-ны өөрчлөлт, МОХ-ны тухай ярилаа. Олон хүний асуултанд хариулсны дотор
- МХЗЭ-ийн ТХ-ны гишүүний хувьд МХЗЭ-ийн онц их хурлыг яаралтай хуралдуулах санал тавьлаа.
10:30. “Монгол Пресс”-ийн сурвалжлагч Л.Гантуяад ОУОХ, МОХ-ны өнөөгийн байдлын тухай ярилцлага өглөө.
14:30. МОХ-ны дарга байсан (3 хоногийн өмнө МОХ-ны тэргүүлэгчдийн хурлаар больсон), ТХ-ны НБД Г.Ганболдтой уулзаж МОХ-ны бодит байдлыг ярилцлаа.
16:00-21:00. МУИС 3-р байранд (хуучин Дээд Боловсролын хороо) дараах бүрэлдэхүүн цугларав.
Ардчилсан хүчний хамтарсан хуралдаан:
- МОХ: Л.Болд, Д.Жаргалсайхан, Зоригоо (оюутан), Рэнцэнтавхай
- Шинэ Дэвшил Холбоо: Батсүх (багш), Б.Сундуй, Ш.Шагдарсүрэн, Ж.Бор
- Ардчилсан Социалист Хөдөлгөөн: Ч.Лхагважав, Р.Хатанбаатар, П.Улаанхүү, Р.Гончигдорж
- Монголын Ардчилсан Холбоо: Батсүх.Я, Жаргалсайхан (Буян), Элбэгдорж (Улаан Од), Төмөрбаатар
Дөрөв дөрвөн хүнтэй уулзаж, хоёр асуудлаар маш удаан маргаж ярилцав.
- Ямар үндсэн байр суурин дээр нийлж болох вэ?
- 3-р сарын 4-ний бүх нийтийн жагсаалыг зохион байгуулах талаар
Онцгойлж тэмдэглэвээс:
Монголын Ардчилсан Холбооны Б.Жаргалсайхан (Буянт Хоршоолол):
– Содном бол Цэдэнбал шиг орос авгайтай, Зөвлөлт талын хүн. Бидэнд тэр гарын үсэг зурсан нууц баримт байна. ЗХУ-аас 1,3 миллиард долларын өр тавьж, ахиад монголыг худалдсан.
– Өчигдөр Зөвлөлтийн элчин сайдын яаман дээр элчин Ситнихов хэвлэлийн бага хурал хийж “яахав бид танай малчдад 25 сая рубль лаа, ахуйн хэрэглээний юм өгнө” гэлээ.
– Одоогийн намын удирдлага гэмт хэрэгтнүүд учир тэдэнтэй нэг ширээний ард суухгүй.
Монголын Ардчилсан Холбооны Элбэгдорж (Улаан Од сурвалжлагч):
– МОХ-г 3-р сарын 4-ний Бямба гарагт бүх нийтийн хичээл хаяхыг уриалав. (зохиохыг)
– Хэрэв хичээл хаяхгүй бол материал үйлдвэрийн салбарт ажил хаяхыг зохионо гэлээ.
– 3-р сарын 3-4 бол Хувьсгалын өдрүүд, цус ч урсаж болох юм. Монголын Ардчилсан Холбоо Улаанбаатарт гэхэд 102 салбартай.
– Бид одоохон улс орныг өөрчлөхгүй бол зун гадаадын оюутнууд ирээд чемодантайгаа жагсах байх.
Эцэст нь Монголын Ардчилсан Холбоо (Элбэгдорж) Шинэ Дэвшил Холбоо (Батсүх) Ардчилсан Социалист Хөдөлгөөн (Гончигдорж) МОХ (Жаргалсайхан) нар ажлын групп болон дараах баримтыг боловсруулж ороход, хамтран баталсан болно.
Үүнд:
- Хамтарсан мэдэгдэл БНМАУ, АИХ (Ардын их хурал), МАХН-ын ТХ, СНЗ-д (Сайд нарын зөвлөл) гаргалаа.
- Уриалга БНМАУ батлан хамгаалах зэвсэгт хүчний нийт бие бүрэлдэхүүнд, НАХЯ-ны (Нийгмийг аюулаас хамгаалах яам) нийт бие бүрэлдэхүүнд.
Хамтарсан мэдэгдэлд:
- МАХН-ын Онц их хурлыг 3-р сард хуралдуулж НТХ (Намын төв хороо) бүрэлдэхүүнийг өөрчлөх, нам төрөөс үйл ажиллагаа тусгаарлах.
- АИХ-ын онц чуулганыг хуралдуулж Ардын түр их хурлыг байгуулах, улс төрийн бүх хүч тэгш эрхтэй оролцож чөлөөт сонгуулиар Ерөнхийлөгч сонгох.
- Төрийн тусгаар тогтнол, улс үндэстний эв нэгдэл, ард түмний аюулгүй байдлыг эрхэмлэх.
Уриалгад:
- Дээрх хоёр яамны нийт бие бүрэлдэхүүнд ямар ч нөхцөлд ард түмнийхээ эсрэг зэвсэг үл хэрэглэхийг уриалсан.
Шийдвэр:
- 3-р сарын 3-нд 09:00 цагаас Сүхбаатарын талбайд төлөөлөгчид цуглаж, 10:00 цагт Батмөнх даргад хамтарсан мэдэгдэл гардуулах (оюутан хичээл хаяхыг МОХ зөвшөөрөөгүй)
- 3-р сарын 4-нд 13:00 цагт цуглаан хийх. Хамтарсан мэдэгдлийн хариугаа Батмөнх даргаас авах.
- Сүхбаатарын талбайд хийхийг тохироогүй. Монголын Ардчилсан Холбоо шаардсан боловч энэ талаар 2-р сарын 27-нд 18:00 цагт Залуус танхимд ахиж уулзаж ярилцах.
21:30-22:10. МУИС Оюутны зөвлөл дээр ирж 20 гаруй оюутнуудад хамтарсан цуглааны үр дүнг танилцуулахад өндөр сэтгэгдэлтэй хүлээж авч, бид дөрөвт баяр хүргэв.
22:10-23:00. Л.Болдын өрөөнд бид хоёр уулзаж МОХ-ны онц IV бага хурлыг зохион байгуулах тухай ярилцав”
Жич: Би Олон улсын оюутны холбоонд МОХ-г төлөөлж Прага хотод ажилладаг байсан. Улаанбаатарт ирж 1990.02.18-ны Ням гарагт Монголын Ардчилсан Холбооны анхдугаар их хуралд оюутан П.Цэнгүүний (одоо Алтан Тариа компани) хамт төлөөлөгчөөр ирж оролцсон.
Би өдрийн тэмдэглэлээ шөнө нь сууж, эрээчсэн цаасаа эмхлэн, буулгадаг байлаа. Улс төрийн хүчин гээд өөрсдийгээ нэрлэсэн байгууллагуудыг оюутнууд маань олж уулзан, тэднийг урин, яаж хамтарч, хүчээ нэгтгэх тухай ярилцах шаардлага тулгараад байлаа.
Энэхүү анхны уулзалтад олон хүмүүс ирж, зохион байгуулалт муу, хүн бүр үг хэлэх гээд зүтгэж байсан тул, Гончигдорж багшийн саналаар дөрвөн байгууллагаас, дөрөв дөрвөн хүн суугаад, дөрвөлжин хэлбэрээр ширээгээ байрлуулан хэлэлцэх болж бусад нь тарснаар, уулзалт жигдэрсэн билээ.
Ямар ч гэсэн шинэ монголын төр засгийг яаж өөрчлөх тухай удтал хэлэлцсэний эцэст анхны албан мэдэгдлийг гаргасан юм. Түүнийг хожим нь МУ-ын Их хурлын дарга, Ерөнхийлөгч болох хувь тавилантай хоёр эрхэмтэй хажуу өрөөнд орж, цаасан дээр буулгасан түүх ийм юм.
Энэ дөрвөн байгууллагаас албан ёсны, төрд бүртгэлтэй, өөрийн тамга, бичгийн машинтай ганц байгууллага нь Монголын Оюутны Холбоо байсан. Монголын Ардчилсан Холбоо тэгэхэд нам болоогүй байсан ч, эвслийн Засгийн газар байгуулна гэж байлаа.
Ардчилсан дөрвөн хүчний дараагийн уулзалт 1990.02.27-д 18:30-аас болсон. Тэмдэглэл нь бас бий. Энэ өдөр билгийн тооллын XVII жарны төмөр морин жилийн шинийн хоёрон байлаа.
2019.04.17