(2024 оны УИХ-ын сонгуульд өрсөлдөж буй намууд, нэр дэвшигчид, сонгогчдод хандах нь No:02)
Монголчууд бид цаашаа хэрхэн яаж амьдрахыг тодорхойлох түүхэн үйл явдал болох гэж байна. Хүн бүрийн амьдралд нөлөөлөх учраас сонгуульд бүгдээрээ оролцох цаг болжээ. Та ирэхгүй бол таны сонголтыг шал өөр хүн хийнэ гэдгийг бүү март!!!
Төрийн эрхийг худалдах авах оролдлого!
Ардчилсан Монголын түүхэнд Та бид Их хурлын сонгуулиа хоёр дахь удаагаа холимог тогтолцоогоор арван хоёр жилийн дараа хийх гэж байна. 2024 оны энэ сонгуулиар 78 гишүүн тойргоос, 48 гишүүн намынхаа нэрсийн жагсаалтаар сонгогдоно. Нэрсийн жагсаалтыг 5-р сарын 20 ны Даваа гарагт нийтэд зарлах ёстой.
Тиймээс энэ амралтын өдрүүдэд МУ-д түүхэн том мөнгөн дүнтэй улс төрийн наймаа явагдах болтой. Учир нь намын жагсаалтанд өөрөө/ах дүүгээ оруулахын тулд намд нь 2-6 тэрбум төгрөг (1.8 сая дол) “хандивлах” наймааны тухай нийгмийн сүлжээгээр шуугисаар байна.
Хэрэв тэгвэл нийгмийн бүх давхрага, хүн амын бүх хэсгээ төлөөлөлтэй болгох гэж гишүүдийн тоогоо 52-оор нэмсний учир агуулга арилна. Намын жагсаалтанд эмч, багш, инженер, манлайлагч биш их мөнгөтэй хүмүүс л орж ирнэ.
Суудал худалдаж авсан гишүүний гол зорилго нь мөнгөө олон дахин өсгөх, сайд болох, төсвийн тендер авах, компанидаа илүү ашигтай хууль, журам батлах болохоос иргэдийн амин чухал үнэт зүйл, түүний дотор үгээ хэлэх эрх чөлөө, шудрага ёс, сайн ажиллаж сайхан амьдрах боломжийн тухай бодохгүй шүү дээ.
Шудрага шүүхгүй түүх үргэлжлэх болохоос, авилга буурахгүй, амьдралд чанарын өөрчлөлт гарахгүй, төгрөг унасаар, үнэ өссөөр, гадагшаа дүрвэсээр байх болно.
Улс төрийн намуудын дарга нар ийм наймаанд оролцох аваас “Төрийн эрх мэдлийг хууль бусаар авах, авахаар завдахыг хориглоно” гэсэн ҮХ-ийн 1.3.2 -р заалтыг зөрчих болно. Компани, иргэдийн хандив хуулиараа хязгаартай. Монголчууд цөөхөн, хэн нь хэдийг өгч орж ирсэн нь төдөлгүй гараад л ирнэ. Бараг л шууд танигдана.
Шудрага үнэнийг тогтоох, шүүхийн тогтолцоо хэзээ нэгэн цагт гарч ирнэ гэдэгт итгэж байна.
Шинэ засгийн газрыг эхнээс нь тогтвортой байлгах нь
Өнгөрсөн сонгуулиудын туршлагаас харахад ялсан намын дарга нь Ерөнхий сайд болвол засгийн газар цаг алдахгүй түргэн байгуулагдаж, төрийн ажил цалгардалгүй явж иржээ. Ардчилал хөгжсөн орнуудад намын дарга нь шууд ЕС болдог журамтай. Тиймээс сонгуульд орж буй бүх намуудын дарга нь ЕС болно гэдгээ зарлах хэрэгтэй байна. Чадвал бүр ЗГ-ын гишүүдээ, хэн аль яамны сайд болохоо хүртэл зарлах нь санал авахад ч нөлөөлнө шүү дээ.
Мөн дээрх намын жагсаалтанд, сайдын орон тоонд гэмт хэрэгт, ялангуяа авилгад нэр нь холбогдож байсан гишүүнийг оролцуулахгүй байхыг 29 нам, 2 эвсэлд нийт иргэд уриалах цаг болжээ. Үгүй бол засгийн газар тогтворгүй байх бас нэг шалтгаан гарна.
Улс төрчдөө ухаалагаар сонгох цаг дөхсөөр байнаa.
“Булаагдсан төр” (State capture) болчихгүй юмсан…
Улаанбаатар. 240517
Энд дарж (УИХ-ын сонгуульд өрсөлдөж буй намууд, нэр дэвшигчид, сонгогчидод хандах нь No:01)–ийг уншаарай.